المخرج ثيو أنجيلبولوس في كتابه كان بيتكلم عن اختيار ماستروياني لدور البطل في فيلم
Beekeeper
فبيقول إنه في البداية لما شاف ماستروياني قال إنه وسيم زيادة عن اللازم والدور محتاج حد فيما معناها بالعامية أخشن شوية لكنه لما قعد مع مارسيلو وبدأ يقرأ له السيناريو لقاه بيبكي فقرر وقتها إنه هيكون مناسب للدور وكان سعيد جداً بالشغل معاه وكرر التجربة مع ماستروياني في فيلم خطوة اللقلق المعلق..
بيقول أنجيلوبولس إن المرشح الأول لفيلم
Eternity and a day
كان ماستروياني لكنه لما شافه في مهرجان للأفلام مع فيلليني لقاه منهك وبيعاني من مشاكل كتير ومش هيقدر يشتغل وقتها أسند الدور لبرونو جونز وبيقول إن بعدها توفى ماستروياني بفترة بسيطة قبل حتى صناعة الفيلم..
ماستروياني بالمناسبة كان صديق حميمي جداً لفيلليني وقبلها كان زميل لجوليتا ماسيني أيام الدراسة وهي اللي رشحته لدوره في فيلم لا دولشي فيتا واللي بالمناسبة كان نقطة انطلاق نجومية ماستروياني، وقبلها اشتغل في أفلام مغمورة يمكن أشهرهم الليالي البيضاء لفيسكونتي، بعد عرض الفيلم شعر فيلليني إن ماستروياني بيتكلم بلسانه وبيعبر بعنيه هو..
فأشركه معاه في أكثر تجاربه الذاتية
8.5, la dolce vita, city of women, Ginger and Fred ..
وأصبح من أقرب الناس له..
فيلليني في كتابه حكى عن موقف طريف حصل بينه وبين ماستروياني إنه علشان دوره في Ginger and Fred طلب منه إنه يصبغ شعره ويقصره علشان يبدو أصلع وقاله متقلقش هيطلع تاني لكن بعدها بفترة طويلة شعر مارسيلو مطلعش ووقتها ماستروياني كلم فيلليني واتخانق معاه وقاطعه فترة طويلة وكان علشان يداري الجزء اللي مطلعش من شعره بيلبس طاقية يداريه بيها وكان فيلليني علشان يضايقه بيقوله يا أصلع..
واللي رشح ماستروياني لدوره في فيلم
Beekeeper
كان كاتب السيناريو والشاعر الإيطالي العظيم Tonino Guerra
اللي كتب أفلام زي
نوستاليجا لتاركوفسكي
وثلاثية الليل لأنطونيوني
وأماركورد لفيلليني
ومعظم أفلام أنجيلوبولوس
وأفلام تانية لفيلليني و أنطونيوني وباولو تافياني ودي سيكا
فيلليني وأنجيلبولوس في كلامهم عن ماستروياني قالوا إنه كان بيتعجب من المجهود الكبير اللي بيبذله ممثلين هوليوود لإتقان الدور وإن الموضوع أبسط من كده بكتير وإنه كان بمجرد حضوره بيلبس الشخصية بشكل كامل بدون أي مجهود وبيأدي الدور بإتقان تام من غير أي تكلف.
 |
| مارسيلو ماستروياني والمخرج فيدريكو فيلليني |
تعليقات
إرسال تعليق